Num 15 | Ndebele | STEP | IN kosi yasikhuluma kuMozisi isithi:

Numbers 15

Imilayo mayelana leminikelo

1 INkosi yasikhuluma kuMozisi isithi: 2 Tshono ebantwaneni bakoIsrayeli uthi kubo ^a: Lapho lifika elizweni lokuhlala kwenu, engilinika lona, 3 lisenza umnikelo owenzelwe iNkosi ngomlilo, umnikelo wokutshiswa kumbe umhlatshelo ^b, owokugcwalisa isithembiso, loba emnikelweni wesihle ^c, loba emikhosini yenu emisiweyo ^d, ukwenza uqhatshi olumnandi eNkosini, okuvela enkomeni kumbe ezimvini ^e, 4 lowo-ke onikelayo umnikelo wakhe eNkosini ^f uzasondeza umnikelo wokudla, ube ngokwetshumi lempuphu ecolekileyo ^g ixubene lengxenye yesine yehini* yamafutha ^h; 5 lewayini libe ngumnikelo wokunathwayo, ingxenye yesine yehini*, uzakulungisa lomnikelo wokutshiswa loba umhlatshelo, owewundlu elilodwa ⁱ. 6 Kumbe owenqama lizalungisa umnikelo wokudla, ube zingxenye ezimbili etshumini zempuphu ecolekileyo ixubene lamafutha, ingxenye yesithathu yehini* ^j; 7 lewayini libe ngumnikelo wokunathwayo, ingxenye yesithathu yehini*, uzalinikela libe liphunga elimnandi eNkosini. 8 Njalo nxa lilungisa ithole eliduna lenkomo libe ngumnikelo wokutshiswa kumbe umhlatshelo, owokugcwalisa isithembiso, kumbe iminikelo yokuthula eNkosini ^k, 9 uzanikelela-ke ithole lenkomo umnikelo wokudla, ube zingxenye ezintathu etshumini lempuphu ecolekileyo ixubene lamafutha, ingxenye yehini* ^l. 10 Linikele iwayini libe ngumnikelo wokunathwayo, ingxenye yehini, kube ngumnikelo owenziwe ngomlilo olephunga elimnandi eNkosini. 11 Kuzakwenziwa njalo ngaleyonkunzi, loba ngaleyonqama, loba ngewundlu, kumbe ngezinyane ^m. 12 Njengenani elizalilungisa, lizakwenza njalo kuleyo laleyo, ngokwenani lazo. 13 Wonke owokuzalwa elizweni uzazenza njalo lezizinto, ekunikeleni umnikelo owenziwe ngomlilo woqhatshi olumnandi eNkosini. 14 Uba-ke owemzini ohlala njengowezizwe lani, kumbe loba ngubani ophakathi kwenu ezizukulwaneni zenu, njalo enikela umnikelo owenziwe ngomlilo woqhatshi olumnandi eNkosini, njengoba lisenza uzakwenza njalo. 15 Kuzakuba lesimiso sinye kini abebandla lakowemzini ohlala njengowezizwe ⁿ, isimiso esilaphakade ezizukulwaneni zenu; njengani uzakuba njalo owemzini phambi kweNkosi ^o. 16 Kuzakuba lomthetho munye lesimiso sinye kini lakowemzini ohlala lani njengowezizwe.

17 INkosi yasikhuluma kuMozisi isithi: 18 Tshono ebantwaneni bakoIsrayeli uthi kubo: Ekungeneni kwenu elizweni engilisa kulo ^p, 19 kuzakuthi nxa lisidla okokudla kwelizwe, linikele umnikelo wokuphakanyiswa eNkosini ^q. 20 Ngokokuqala kwenhlama yenu ^r lizanikela iqebelengwana ^s, kube ngumnikelo wokuphakanyiswa ^t; njengomnikelo wokuphakanyiswa webala lokubhulela, ngokunjalo lizawuphakamisa. 21 Ngokokuqala kwenhlama yenu ^u lizanika eNkosini umnikelo wokuphakanyiswa ezizukulwaneni zenu.

22 Uba-ke liduha, lingenzanga yonke imilayo le iNkosi eyikhulume kuMozisi ^v, 23 konke iNkosi elilaye khona ngesandla sikaMozisi kusukela ngosuku iNkosi eyalaya ngalo kusiya phambili ezizukulwaneni zenu, 24 kuzakuthi-ke uba kwenziwe ngokungazi, kungekho emehlweni enhlangano, inhlangano yonke izanikela ijongosi elilodwa ithole lenkomo, libe ngumnikelo wokutshiswa, kube luqhatshi olumnandi eNkosini, lomnikelo walo wokudla, lomnikelo walo wokunathwayo njengomthetho ^w, lezinyane lembuzi elilodwa, libe ngumnikelo wesono ^x. 25 Umpristi uzakwenzela-ke inhlangano yonke yabantwana bakoIsrayeli inhlawulo yokuthula, bakuthethelelwe, ngoba kuyikungazi, futhi bona bazaletha umnikelo wabo, umnikelo owenzelwe iNkosi ngomlilo, lomnikelo wabo wesono phambi kweNkosi, ngenxa yesiphambeko sokungazi kwabo ^y. 26 Lenhlangano yonke yabantwana bakoIsrayeli izakuthethelelwa, lowemzini ohlala njengowezizwe phakathi kwabo, ngoba kubo bonke abantu kwakusekungazini.

27 Uba-ke umuntu oyedwa esona ngokungazi, uzasondeza isibhuzikazi esilomnyaka owodwa, sibe ngumnikelo wesono ^z. 28 Lompristi uzawenzela lowomphefumulo owone ngokungazi inhlawulo yokuthula, lapho one ngokungazi phambi kweNkosi, ukumenzela inhlawulo yokuthula; uzakuthethelelwa-ke ^aa. 29 Lizakuba lomlayo munye kwalowo owona ngokungazi, owokuzalwa elizweni phakathi kwabantwana bakoIsrayeli, lowemzini ohlala njengowezizwe phakathi kwabo ^ab.

30 Kodwa umuntu okwenza ngabomo, engowokuzalwa elizweni loba engowemzini ^ac, ethuka iNkosi ^ad; njalo lowomuntu uzaqunywa asuke phakathi kwabantu bakibo ^ae. 31 Ngoba edelele ilizwi leNkosi, wephula umlayo wayo, lowomuntu uzaqunywa lokuqunywa; ububi bakhe buzakuba phezu kwakhe ^af.

Ukubulawa komuntu othile owatheza inkuni ngesabatha

32 Kwathi abantwana bakoIsrayeli besenkangala, bafica umuntu etheza inkuni ngosuku lwesabatha ^ag. 33 Labo abamficayo etheza inkuni bamletha kuMozisi lakuAroni lakunhlangano yonke. 34 Bamfaka esitokisini, ngoba kwakungakatshiwo ukuthi kuzakwenziwani kuye ^ah. 35 INkosi ^ai yasisithi kuMozisi: Lowomuntu kabulawe lokubulawa; inhlangano yonke izamkhanda ngamatshe ngaphandle kwenkamba ^aj. 36 Lenhlangano yonke yamkhuphela ngaphandle kwenkamba, yamkhanda ngamatshe waze wafa, njengokulaya kweNkosi kuMozisi.

Mayelana lentshaka zezembatho zabantu

37 INkosi yasikhuluma kuMozisi isithi: 38 Khuluma ebantwaneni bakoIsrayeli, ubatshele ukuthi bazenzele izintshaka emagumbini ezembatho zabo, ezizukulwaneni zabo, lokuthi bafake entshakeni yomphetho intambo eluhlaza okwesibhakabhaka ^ak. 39 Njalo kuzakuba kini yintshaka ukuze likukhangele, likhumbule yonke imilayo yeNkosi, liyenze, lingadingi lilandele inhliziyo yenu lilandele amehlo enu ^al, eliphinga ngokukulandela ^am. 40 Ukuze likhumbule lenze yonke imilayo yami, libe ngcwele kuNkulunkulu wenu ^an. 41 NgiyiNkosi uNkulunkulu wenu eyalikhupha elizweni leGibhithe ukuba nguNkulunkulu wenu; ngiyiNkosi uNkulunkulu wenu ^ao.